Dopo restaur e infrastruturazion dal prin toc intal 2017, la viertidure al public intal 2019 dal Baluardo Donato, chel conservât miôr de Fuartece, il Comun di Palme al à aprovât il progjet definitîf-esecutîf di ampliament e restaur des galariis soteraniis dal Rivelin 2r1. L’intervent al doplearà il percors di visite puartantlu a plui di 600 metris e lu fasarà plui tratîf dal pont di viste de esperience multimediâl e turistiche.
“La Palme sot tiere, in chescj agns, e je daûr a otignî un grant sucès di visitis. I numars dal 2019 a jerin di plui di 6.700 visitadôrs ad an. Un percors unic e particolâr tra lis viis militârs soteraniis de Fuartece. Cun chest progjet o fasìn cheste visite plui ample, interessante e apassionante. O contìn la storie militâr de Fuartece traviers lûcs, personis e esperiencis. Chest percors si integre cu la visite, traviers la galarie di Jessude, a Baluardo Donato”, al comente Luca Piani, assessôr comunâl cun deleghe ai Bastions.
E al zonte Francesco Martines, assessôr aes Oparis publichis: “O stin fasint grancj intervents inte stesse aree: la gnove stazion des corieris cun gnove viertidure de vie des miliziis sul tierç anel, la sale espositive multimediâl intal cjast de Filzi, il rifasiment de aree denant la stesse ex caserme, il pont di viste panoramic su la Tor de aghe, i intervents di metude in sigurece, sistemazion e iluminazion su lis lunetis napoleonichis dongje, cun galariis di colegament cul fossâl. La ufierte turistiche integrade si slargjarâ une vore cuant che ancje il Museu Militâr su Puarte Cividât al passarà in gjestion al Comun”. (A.D.G.) – 01.02.2023
