Ancje di Sierade, turisim ‘slow’ in batel

I tramonts sflandorôs che a piturin il cîl e lis aghis, l’aiar di mâr e la vignude dai uciei migratoris: di Sierade, la lagune di Maran si vistìs cul so abit miôr. Cun “Laguna d’Autunno” e torne la iniziative dal Batel “Santa Maria” pai amants de nature e dal turisim “slow”: dai 18 di Setembar ai 23 di Otubar, par sîs domeniis, in compagnie dal cjapitani Nico Pavan, si viazarà intai canâi de lagune di Maran fin a Lignan, par gjoldi de lûs dai tramonts dal Nord Est e cjalâ il spetacul dai uciei migratoris che a rivin de Europe setentrionâl e si fermin pal Invier. La navigazion e rive fin ai confins de Risierve dal Flum Stella e fintremai a un toc de litoranie dal Venit. Dai 15 di Otubar, ogni sabide e domenie e fin a Dicembar, al torne ancje un altri apontament classic pal Batel: lis croseris enogastronomichis di “Laguna in Tecja”. (A.I.) – 15.09.2022