Al cjape il vie un cicli di trê cines organizât e promovût de Consulte dai Zovins de Risierve di Biosfere MAB UNESCO “Alpi Giulie”. Fîl condutôr dai trê cines proponûts al è il teritori, indulà che i protagoniscj a contin di une ricercje personâl, di un cambiament o di une aventure di vivi. Intal cors des trê seradis, i autôrs a saran presints par aprofondî intune cul public i temis a lôr cjârs e par fâlu apassionâ.
La prime proiezion e je in program par vinars ai 12 di Mai aes 8 e mieze di sere intal Cine Teatri sociâl di Glemone che al ospitarà il cine “STEPS – Alpiniscj zovins su trois antîcs”, regjie di Alberto Dal Maso e Sara Segantin. Il cine al va daûr de storie di cinc alpiniscj zovins e un cjan sui segns di John Muir, intun viaç tra Dolomitis furlanis e Yosemite. Une aventure no semplice e plene di sorpresis, cu la volontât condividude di “fâ feliçs lis monts e jessi feliçs cun lôr”. In sale a saran presints i autôrs, che a dialogaran cui fantats de Consulte par aprofondî i temis dal cine.
La Consulte dai zovins de Risierve di Biosfere MAB UNESCO “Alpi Giulie Italiane” al è un grup di fantats di etât cjapade dentri tra i 18 e i 30 agns unîts de passion pe nature. Il lôr obietîf al è promovi la partecipazion ative des gnovis gjenerazions intes ativitâts teritoriâls e incoragjâ la cooperazion tra i zovins residents inte aree de Risierve. Par savêndi di plui e restâ inzornâts su lis ativitâts, consultait la pagjine web e i cjanâi Social dal Parc Naturâl des Prealps Juliis. (A.D.G.) – 09.05.2023
