Ae scuvierte des bestiis dal bosc

Dut gnûf il Centri visitis dal Parc di Pianpinedo, tal comun di Cimolais. La mostre e permet cussì di cognossi miôr lis bestiis che a son tal bosc, che al cjape dentri passe 35 etars dongje des Dolomitis furlanis. Un biel toc di tiere dut centât dulà che a vivin libars cierfs, cjavrûi, becs di mont, cjamoçs, cun in plui plantis e rosis di grant interès, che si puedin viodi vie pai trois ben segnâts. Il Centri al à trê stanziis, cun ancje un biel spazi pe reception. Si tache cu la mostre sui animâi presints tal parc, ancje fasint scoltâ la lôr ‘vôs’. I visitadôrs a puedin doprâ la tecnologjie, cun panei e altris imprescj, par cognossi miôr il lôr numar e cemût che a vivin. Un spazi a pueste al è dedicât a lis lôr talpadis. La mostre e conte ancje de storiche fornâs di cjalcine che si cjate dentri tal parc. Il zîr dal Centri, che al è viert di Avrîl a Otubar, si siere cu la sale clamade “Cason”, che e fâs viodi une cjasute dute di len doprade in passât dai boscadôrs. (R.C.) – 16.04.2025