A Palme, ducj in place cul “BeT Festival”

Dai 23 ai 26 di Otubar, la citât di Palme si animarà cun laboratoris creatîfs, events musicâls, cjaminadis compagnadis di contis, coreografiis coletivis, teatri ritmic e la art dai sbandieradôrs. Il “BeT Festival” al torne par une cuarte edizion plene di esperiencis artistichis, intun festival slargjât su dut il teritori e pensât par dutis lis etâts, par grancj e piçui, instreçant lis lidrîs de tradizion cuntun lengaç contemporani che al tire dentri cualchi realtât dinamiche a nivel nazionâl PsycoDrummers, Invasioni Creative, Damatrà, Circo all’InCirca, GAMS. La rassegne, che e vûl jessi soredut un moment di incuintri dal public cui artiscj e il teritori, cuntune atenzion particolât pes gnovis gjenerazions, e tache joibe ai 23 aes 6 di dopomisdì, cuntune schirie di concierts: un di chei al è un spetacul che al conte la storie dal vin e de bire. (A.I.) – 21.10.2025