A Lignan la fieste dai motârs, massime chei cu la barbe!

Daspò de trentesime novesime “Biker’s Fest” a Lignan tal mês di Mai, e rive une altre setemane di motârs tal stes lûc, la “Italian Bike Week” che si davuelç di joibe ai 18 e fint a domenie ai 21 di Setembar. La cuarte edizion dal grant radun di motos che al siere la stagjon des feriis al mâr e je dedicade soredut aes motocicletis “off road”, ven a stâi fatis par lâ su dutis lis stradis (adventure, enduro, cross…). Dentri de manifestazion e je stade programade une schirie di events: par esempli, la “Beard’s Race”, le gare no dome pes motos, ma ancje e soredut pes barbis e lis mostacjis plui bielis! La idee e je di Fabrizio Bottos, furlan di Daçan, dôs voltis campion dal Mont… di barbe tai “World Beard and Moustache Championships” cui siei 60 cm! Il premi de gare speciâl di Lignan, vierte a ducj sabide ai 20 te arene dai baracons, al sarà dât ai miôr motârs in trê categoriis: barbe, mostacjis e barbuç. (A.I.) – 17.09.2025