A Lignan al torne a vierzi il Parc Zoo

Joibe ai 28 e torne a tacâ la stagjon dal Parc Zoo “Punta Verde” di Lignan par pandi ai siei visitadôrs lis maraveis de nature e dai animâi, mantignint vive la sô mission di conservazion e di sensibilizazion ambientâl. A pôcs metris dal mâr, il Parc al è un cjanton plen di vert e cun centenârs di animâi di speciis diviersis, ambassadôrs di lûcs lontans che cul lôr incjant e carisme a contribuissin ae conservazion des speciis e dai ambients menaçâts. Dilunc des fiestis aviertanis a son stadis ideadis iniziativis esclusivis par cjapâ dentri fruts e fameis. Tra chestis, il “Zardin des esperiencis naturâls”, un lûc speciâl dulà che i visitadôrs a puedin scuvierzi e sperimentâ ativitâts diviersis, pensadis par stiçâ la curiositât e l’aprendiment condividût cun dute la famee. (A.I.) – 27.03.2024