A Aquilee si cjamine su la storie

Aquilee e vierç al public un altri toc dal so passât roman: il decuman di Aratria Galla, la strade antighe, acessibile di vie Julia Augusta ae altece dal Forum roman, che al colegave in sens Est-Ovest il puart fluviâl cu la zone dal forum e dal teatri de citât antighe. Il non “Decumano di Aratria Galla” al è stât dât dopo vê cjatât dôs epigrafis che a testemonein il lastri stradâl tant che at di gjenerositât di une femine, Aratria Galla. Tra la fin dai agns ‘60 e il principi dai ‘70 dal secul passât, al è stât ogjet di sgjâfs di bande de Sorintendence. La Fondazione Aquileia e à acuisît la aree intal 2019, inviant un progjet di restaur complessîf. Ae fin, il percors di visite ae aree archeologjiche – a gratis e ogni dì – al sarà ancjemò plui grant. (A.I.) – 02.03.2023