Zaniolo si ferme par un fastidi al menisc

Cuant che Zaniolo al è stât amonî tal prin cuart di ore de seconde metât de partide Udinese-Pisa di sabide passade, tancj di lôr a àn tacât a bruntulâ intal stadi di Udin. Ancjemò di plui cuant che al è stât clamât fûr dal cjamp di zûc pôcs minûts dopo di Runjiac par fâ puest a Gueye. Ma parcè?, si domandavin i solits esperts, nol jere stât tirât vie prime, stant che un altri cartelin zâl al voleve dî che al varès pierdût la partide cuintri l’Inter di sabide che e ven. Parcè che la stele blancje e nere e saveve za che nol varès zuiât in chê partide. Rivât a Udin tal ultin dî dal marcjât chest Istât par tornâ ae sô miôr forme di cariere, daspò di un pâr di esperiencis mancul positivis e cualchi probleme fisic, Nicolò al à di fermâsi – dopo vê fat 20 partidis une daûr di chê altre, cun sîs gol e doi assist – par vie di un piçul probleme cul zenoli. “Par disgracie, intant che mi alenavi prime de partide cuintri il Turin la setemane passade, o sintivi un piçul fastidi tal zenoli”. Cussì al à scrit sui social, zontant: “Cumò o ai di fâ une polse par une piçule operazion al zenoli che mi permetarà di tornâ ancjemò plui fuart intun pâr di setemanis”. Intant che o spietìn la comunicazion uficiâl de societât, daspò di une netade dal menisc dal zenoli di drete intune cliniche di Rome, i fasin ducj i miôr auguris. A lui, al Udin e forsit ancje ae scuadre nazionâl. (A.I.) – 12.01.2026