Une cubie di nivel pe prime “Europeada” furlane

Il grup tecnic de Selezion dal Friûl, che pe prime volte e larâ chest Istât a zuiâ la “Europeada”, il campionât di balon des minorancis linguistichis in Europe, si slargje cu la jentrade di Devid Trangoni. L’alenadôr de Union Martignacco, scuadre vuide pe partecipazion cui zuiadôrs de FIGC, la federazion dal balon, al rive di une altre stagjon strabuine in Promozion. E al va a completâ, intun cun Mauro Lizzi, une cubie tecniche di grant nivel. “E je la cubie che jo mi jeri imagjinât par cheste prime esperience internazionâl!” – al spieghe Daniele Puntel, il president de ASF, la Associazion sportive furlane – e o crôt che a puedin rapresentâ il miôr pussibil dal balon furlan dai diletants. Un al è plui espert a tratâ lis situazions impegnativis e chel altri al è plui usât a lavorâ cui zovins, otignint risultâts plui che bogns. (A.I.) – 24.04.2024