Udin te Cope taliane di bale tal zei

Udin al puarte une scuadre di bale tal zei te Cope taliane di Serie A pe prime volte in vincj agns. La APU Old Wild West si è cualificade pe “Final Eight” di Turin sierant la prime part de stagjon al setim puest. Daspò di vê vinçût cinc des ultimis sîs partidis, la scuadre dal president Alessandro Pedone, alenade di Adriano Vertemati, si è cjatade plui in alt in classifiche par vie de esclusion dal Trapani Shark, radiade de federazion. La scuadre di Udin, che l’an passât e zuiave in A2 e cualchi setemane indaûr si jere cjatade ancje ultime in classifiche par un pâr di partidis, e larà a Turin dai 18 ai 22 di Fevrâr par zuiâ in Cope insiemi cuintri la scuadre di Brescia, il prin aversari. Lis altris scuadris a son la Virtus Bologne e chês di Vignesie, Milan, Tortona, Triest e Napoli. Vincj agns indaûr, la storiche Snaidero alenade di Cesare Pancotto e jere lade aes finâls de Cope taliane al sest puest dal campionât. (A.I.) – 13.01.2026