Udin, maiute speciâl pal taramot

La partide di sabide ai 2 di Mai tal stadi “FriulI” e sarà pardabon speciâl. Par memoreâ il cincuantesim aniversari dal taramot, l’Udin al doprarà une maiute fate dal sponsor tecnic Macron par ricuardâ l’event tragjic dai 6 Mai 1976. E ancje la reazion plene di orgoi, braùre e dignitât e de int e la fuarte volontât di tornâ a fâ su lis cjasis e dut il rest, cul supuart e il jutori de solidarietât rivade in chei dîs. Dignitât e volontât che si podevin lei te famose scrite fate di cualchidun suntun mûr a tocs dongje di Glemone, “Il Friûl al ringracie e nol dismentee.” Chestis peraulis, par talian (“Il Friuli ringrazia e non dimentica”), si viodaran e compâr sul devant di cheste maie speciâl, che e sarà metude sù dome pe partide di campionât cuintri il Torin, la penultime in cjase. La maiute e à un colôr di piere e un dissen grafic che al è compagn des pieris de façade de catedrâl di Vençon, cu lis peraulis “L’Orcolat 6 maggio” daûr dal dacuel. La maiute no varà nissun dai sponsor uficiâi e la societât blancje e nere e à ancje decidût di invidâ alpins, i pompîrs e la Protezion Civîl tal stadi cence sore nuie. (A.I.) – 30.04.2026