Udin: la ultime partide di domenie di sere

La ultime zornade dal campionât di serie A si zuiarà cuasi dute domenie ai 25 di sere, aes 9 mancul un cuart. Lu à decidût il Consei de Leghe, daspò di ve fissât a joibe ai 21 lis partidis des dôs scuadris che a son ancjemò in lote pal scudet: l’Inter (a Como) e il Napoli (in cjase cul Cagliari, che si è za salvât). Sabide ai 24 si fasin dôs partidis che no àn nissune impuartance pe classifiche (Bologna-Genoa e Milan-Monza) e lis altris sîs dutis di domenie di sere, viodût che a rivuardin scuadris ancjemò a risi di là jù in serie B o che a concordin par un puest in Europe. Ancje che dal Udin, che al zuie cuintri la Fiorentina, in cope (la tierce, Confederation League) dome se e vinç e altris dôs a pierdin. L’Udin di Runjaic a varès di saludâ i tifôs cuntune vitorie, almancul par rivâ a 47 ponts, che a son il miôr risultât dai ultins 12 agns, ma nol sarà facil. I infortunis e lis scualifichis a gjavin vie al alenadôr cuasi mieze scuadre e ancje chei altris aromai a somein “in feriis” di cualchi setemane. (A.I.) – 19.05.2025