Udin: la conferme di Runjaic prime dal ritîr

Kosta Runjaic al sarà l’alenadôr par altris doi agns. Daspò de conferme dal diretôr gjenerâl Gianluca Nani e di chel tecnic Gokhan Inler, l’Udin al à uficializât la conferme dal alenadôr, za sot contrat dai 14 di Jugn dal 2024 par un an. La societât, che daûr di cualchi vôs e varès di jessi cuistade di un fonts di invistiment american, e à volût rinsaldâ il leam tecnic cun Runjaic e cuntun percors che tal prin campionât al à puartât 44 ponts, 12 partidis vinçudis, 18 pierdudis e 8 patis. L’alenadôr nassût in Austrie ma di divignince jugoslave, rivât a Udin dal campionât polac, al varà dongje come l’an passât il so vice Przemyslaw Malecki e il colaboradôr tecnic Alex Trukan, ducj pronts pal radun e il ritîr de scuadre, che al tache joibe ai 3 a Udin e po dopo si sposte a Lienz, in Austrie. (A.I.) – 02.07.2025