L’Udin in cjamp cu la maiute cun l’arc di S. Marc

L’Udin in cjamp ancje pe paritât e la tutele dai dirits civîi. Daûr de campagne “A+LOVE” de Lega Serie A, pe trentesime seste zornade di campionât, in ocasion de zornade mondiâl dai 17 di Mai pe lote a omofobie, bifobie e transfobie, la societât e à sielt di zontâsi ae iniziative de Leghe. Par testemoneâ il propri impegn pe avualance, i dirits e la inclusion, domenie di sere cuintri la Lazio la scuadre blancje e nere e metarà sù une maiute speciâl, blancje cul cuel a V cun ôrs blancs e neris e un detai grafic cui colôrs dal arc di S. Marc. Un messaç impuartant, che al testemonee l’impegn de societât e dal propri sponsor tecnic Macron su temis sociâi e civîi, certificât di une classifiche speciâl là che l’Udin al è stât nomenât il club plui sostignibil di Italie e il cuart plui sostignibil tal mont. (A.I.) – 17.05.2023