Udin cuintri Napoli: si zuie di sere

La partide si zuie joibe aes 8.45 di sere. Il prefet di Udin, Massimo Marchesiello, al à confermât, daspò la riunion, che nol sarà nissun altri cambi di orari par Udin-Napoli, la partide che e podarès consegnâ il scudet ae scuadre campane. Il dopli vertiç in prefeture a Udin e a Napoli al à confermât il mudament di date (in origjin e jere previodude vuê), ma no chel dal orari, che al someave che al podès jessi anticipât aes 6 o aes 6.30 dal dopomisdì. Ancje il Prefet di Napoli, Claudio Colomba, al à confermât la decision. La scuadre e rivarà a Udin miercus di sere e e tornarà a Napoli dome vinars di buinore. (A.I.) – 02.05.2023