Udin cuintri Cividât: di usgnot il derby par lâ in “A1”

Pocjis oris al apontament plui impuartant dal an pe bale tal zei furlane. Usgnot aes 8, al PalaCarnera di Udin, a scomencin i play-off pe promozion in A1. La scuadre di cjase, Apu Old Wild West di Udin, e sfide la Ueb Gesteco di Cividât, ai siei prins, storics play-off di A2. La serie e je di trê partidis, duncje Udin e podarà disfrutâ il fatôr ‘di cjase’. E ancje fâ zuiâ Emanuel Terry, il centri american di 206 centimetris rivât dome joibe passade dopo une esperience di cinc mês in Serie A cu la scuadre di Triest. Par Stefano Pillastrini, l’alenadôr di Cividât, i play-off a son “une aventure cetant biele. Nô o sin esordients, o sin ‘invidâts’ a cheste che e je une fieste par dut il panorame nazionâl, e o provarìn a dâ sodisfazion ai nestris tifôs”. (A.I.) – 15.05.2023