Udin: chel “scudet” dai 8 di Setembar dal 1896 mai rivât

No je ni la scuadre ni la societât che o cognossin – nassude tal 1911, cu la iscrizion de Associazione Calcio Udinese ae FIGC, federazion taliane dal zuc dal balon, ma e je par sigûr “storie”. Ai 8 di Setembar dal 1896, ven a stâi cent e vincjenûf agns indaûr, un grup di gjinascj de Societât e gjinastiche e scherme di Udin, nassude za l’an prime, e vinceve a Trevîs il prin campionât di balon fat in Italie. L’an passât, “chel” Udin al veve za fat une partide a Rome, une amichevule cuintri une selezion dal lûc, devant de regjine. La partide dal 1896, vinçude, no vâl un scudet, che al rive dome daspò di doi agns: lu vinç la scuadre di Gjenue, simpri cuntun torneu di dome un dì, parcè che e jere nassude la FIGC (che si clamave FIF). La stesse che doi agns prime no ricognosseve lis regulis dal “balon di gjinastiche”. Chei students ei 16 o 17 agns che a àn vinçût che partide dal 1896, dut câs, a meretin almancul di jessi memoreâts, prime parcè che la bandierute cul “premi” e fo robade dai austriacs vie pe Vuere grande, ancje se nol è mai masse tart pal “scudet”! (A.I.) – 08.09.2025