Talents de scherme in gare a Cividât

Vinars ai 26 e sabide ai 27, a Cividât al sarà ospitât il Festival european di scherme pai atletis sot dai 14 agns, l’event principâl dedicât ai zovins talents tal sport de categorie a nivel continentâl. Rivât ae sô tierce edizion, l’event al met dongje i miôr talents europeans intes categoriis sot dai 14 agns (chei nassûts tal 2012-2013), puartant centenârs di atletis, alenadôrs, diretôrs e fameis di dut il continent in Friûl-Vignesie Julie. Tal Palacet di vie Perusini, 381 atletis di 24 paîs, fruts e frutis, a saran in gare pai sîs titui. L’event al è promovût de Confederazion europeane di scherme in colaborazion cu la Federazion taliane e dal Comitât regjonâl FIS dal F-Vj, cu Academie di scherme “Fiore dei Liberi” responsabil de organizazion locâl. Ancje il contribût ae delegazion al è une vore impuartant: Paolo Menis, ex president dal Comitât Regjonâl de FIS, al vuidarà la scuadre taliane, l’istrutôr di floret al è Fabio Zannier de ASU, e a son stâts clamâts in dut dodis atletis. (A.I.) – 25.06.2026