La tape dal Zîr di Italie in Friûl, sabide ai 30 di Mai, nol sarà facil dismenteâle par une vore di resons. I coridôrs de Caravane rose a coraran dilunc des stradis dai Comuns fiscâts dal taramot dal 1976 tacant di Glemone par rivâ fintremai a Plancjaval a Davian, visant cussì a nivel internazionâl i 50 agns dal sisme e celebrant la rinassite di cheste part dal Friûl. Di Glemone la Caravane e larà a Vençon, par dopo passâ il Tiliment e cori dilunc de strade dongje dal flum fintremai a Bordan, par dopo tornâ a passâ il Tiliment in direzion di Osôf. E sarà daspò la volte di Buie, Dartigne, Tarcint, Nimis, Tresesin, Colorêt di Montalban e Maian. I coridôrs a tornaran a passâ il Tiliment par lâ a Forgjarie par dopo cjapâ la volte di Vît, Clausêt, Travês, Midun, Manià, Montreâl e Davian, dutis localitâts di mont dal Friûl Ocidentâl fintremai ae rivade che e sarà sul Plancjaval (daspò jessi rivade pe prime volte a Plancjaval, la corse e cjaparà la volte dal lât di Barcis e e tornarà a Montreâl).
Al è impussibil no inacuarzisi che su cualchi strade a passaran i cicliscj dal Zîr: dopo i discomuts leâts ai lavôrs lâts indenant tai ultins doi mês, che al someave di jessi tornâts ai timps dal taramot tra machinis in moviment e polvaron – intervents che a son ae fin –, cumò l’asfalt al è tornât a gnûf di pache e fintremai, come a Colorêt di Montalban e a Maian, i citadins a varan a disposizion un acuedot gnûf e ancje la fibre otiche, metûts jù di corse (chest al è dal sigûr un di chei altris miracui permetûts dal passaç dal Zîr di Italie).
La tape in Friûl-Vignesie Julie e sarà la vincjesime di cheste edizion, lungje 199 chilometris e che e tacarà vie pe matine a Glemone, li de caserme Goi-Pantanali, e sarà une vore impuartant ancje dal pont di viste sportîf: no dome e je la ultime ocasion par savoltâ la classifiche, in graciis dai grancj premis de montagne – a saran lis rivis de mont di Clausêt e di chê dople dal Plancjaval, buinis di taiâ lis gjambis ancje ai coridôrs plui fuarts, cuntun disnivel in dut di passe 4.500 metris. Dut chest prime de ultime tape che e sarà fate domenie, ai 31 di Mai a Rome, che dal sigûr no previôt scjassadis, par vie che si tratarà plui che altri di une passarele cui siei 131 chilometris ducj sul plan. (a.d.g.) – 28.05.2026
