Stafete Telethon: al è za ‘bum’ di iscrizions

Al è scomençât il cont par ledrôs pe stafete “24 per un’ora” di Telethon Udin, che pe vincjesime cuinte edizion e fasarà di gnûf bati il cûr de citât tal segn de solidarietât, di sabide ai 2 a domenie ai 3 di Dicembar. La manifestazion e varà, come simpri, il so centri in Zardin grant, là che al sarà ospitât il “Villaggio Telethon”, intant che il circuit 2023, omologât de Fiasp – Aps di Udin, al tornarà ae tradizion, cun cualchi novitât intal percors. A son bielzà cetantis lis iscrizions sul sît telethonudine.it, dulà che al è pussibil consultâ ancje il regolament e cjatâ dutis lis informazions par prenotâ i varis spazis disponibii par camper o par risiervâ il propri puest intal tendon ‘comun’. L’obietîf de manifestazion nol cambie: promovi la ricercje sientifiche su lis malatiis gjenetichis raris de Fondazione Telethon, par dâ rispuestis ai pazients e aes lôr fameis. (A.I.) – 09.11.2023