Puartis viertis pe APU: mandi Zoriks, al torne Hickey

E je finide daspò di mancul di doi mês la esperience dal zuiadôr di bale tal zei Kristers Zoriks cu la APU di Udin: dome 54 dîs. Il leton, che al veve di jessi la vuardie titulâr dal zûc de scuadre, al à fat sù lis valisiis dopo dome siet partidis in campionât e cope, cuntune medie par partide di 2,8 ponts, 1,2 sbalçs e 3,2 assist. Tal so percors a Udin a son stadis plui ombris che lûs, fint al acuardi par sierâ il contrat prime dal timp cu la societât furlane. E il so trasferiment di un dì a chel altri in Turchie, al Markezefendi Basket. La sô partence no sarà jemplade di un gnûf zuiadôr forest, ma di Hickey, la vuardie dal an passât, tornât a Udin in spiete di podê ancje tornâ in cjamp, daspò dai 6 di Avrîl, daspò de scualifiche. (A.I.) – 11.03.2026