Pordenon, Lovisa si rint e al vierç al faliment

E je daûr a sierâsi piês che si podeve la vicende judiziarie de societât di balon di Pordenon. Il president Mauro Lovisa al à decidût di revocâ la propueste di concuardât preventîf, vierzint cussì ae soluzion che i tifôs de citât a vevin plui pôre: il faliment. L’imprenditôr al à sclarît il parcè intun comunicât: “In chescj mês che a son stâts dificii, une volte pierdude la pussibilitât di mantignî il Pordenon in serie D o almancul intal campionât di Ecelence, dopo che si jere pierdude sul cjamp la pussibilitât di tornâ in B, o ai vût cierts moments di smare e di disconfuart. Par agns o ai dedicât al Pordenon no dome che la mê passion e il gno timp, ma une buine part des mês financis e, cundut di vê provât a mantignî in cualchi mût in vite il Pordenon, almancul cu lis scuadris dai zovins, si è discjadenade une campagne di dispresi cuintri di mê, in citât. No ai mai pretindût agrât, ma no pues plui sopuartâ lis ofesis, si che duncje o rinunzii ae domande di concuardât”. (A.I.) – 31.10.2023