Passe 300 atletis “speciâi” aes Olimpiadis invernâls di Sapade

A son stâts presentâts a Udin i 34ts Zûcs nazionâi invernâi Special Olympics – Sapade 2022. Dopo il sucès de edizion 2020, dai 14 ai 18 di Dicembar plui di 300 atletis di 34 scuadris si metaran sot inte corse cu lis gjaspis di nêf e intal schi di fonts. L’avigniment, organizât di Special Olympics Italie e Team FVG e cun la poie di Intesa San Paolo, al à tant che obietîf chel di fâ deventâ protagoniscj ducj i partecipants, cence rivalitâts, batudis, tensions e agonisim esasperât. La Regjon e sarà traviersade dal “Viaç de Torce”, il simbul olimpic, che al partirà di Place Libertât a Udin ai 12 di Dicembar par rivâ il 15 a Sapade, dulà che si spietin atletis, tecnics, acompagnadôrs e familiârs di dut il Paîs, che a saran judâts dai tancj volontaris atîfs in regjon. (A.I.) – 06.12.2022