Pal Udin e rive la prime partide dulà che i ponts a contin

Dopo un pre campionât a corint alternade, al rive il prin apontament impuartant pal Udin: chel di Cope Italie cul Feralpi Salò, formazion di serie C che e à batût intal turni preliminâr il Sudtirôl, a pene promovût in B. Vinars ai 5 aes 6 dopomisdì, la Dacia Arena-Stadio Friuli si vierzarà – ancjemò cence tancj zuiadôrs blancs e neris che a son infortunâts – pe prime partide dulà che il risultât al conte pardabon, dopo la amichevule cul Chelsea. Siet dîs dopo, il 13, inte fin de setemane de Madone di Avost, al sarà za pardabon campionât, cu la prime partide in trasfierte cuintri il Milan, campion di Italie.  (A.I.) – 03.08.2022