No dome une partide di balon, ma un fat di identitât

Si è sierade martars ai 2 di sere, inte suaze dal stadi di Maian, la prime storiche edizion de Cope Friûl, il torneu di balon organizât de ASF Associazion Sportive Furlane in colaborazion cu la FIGC-F-VG: une fieste di sport, identitât e teritori. Devant di un bon public e intune atmosfere di grande fieste e sportivitât, lis dôs scuadris finalistis di Colorêt di Montalban e Manià si son dadis bataie fint al ultin par vinci il trofeu prestigjôs de identitât furlane. Anzit, fint ai suplementârs, là che l’incuintri si è sierât 3 a 1 pe scuadre dal Friûl culinâr. “Cheste prime edizion de Cope Friûl e à dimostrât cetant che il sport al puedi jessi un veicul straordenari di agregazion, identitât e valôrs pal nestri teritori”, al à declarât il diretîf de ASF – Viodi cussì tante passion e int a Maian e je la prove che la strade tacade par valorizâ lis nestris lidrîs traviers il balon e je chê juste”. La Cope e je nassude par valorizâ il balon di paîs e soredut par dâ vôs aes scuadris di tierce categorie. Cumò il Colorêt al varà l’onôr di organizâ in cjase ai prins di Setembar, la prime Supercope dai Popui, cuintri la vincidore de prime FORST CUP, torneu dal Sudtirol par scuadris di tierce e seconde categorie. (A.I.) – 03.06.2026