Cuntun totâl di 108.252 ponts, Tara Dragaš, la gjinaste che e à a pene fat disevot agns de ASU, la Associazion sportive di Udin, e à inmagât il public dal Grand Prix di Thiais 2025 in France, concuistant la medaie di arint. Uniche taliane presinte in cheste gare impuartante di gjinastiche ritmiche, la stele blancje e nere e je stade passade dome de ucraine Taisiia Onofriichuk, che e à sierât il concors gjenerâl cun 115.251 ponts. Tierç puest par chê altre ucraine, Polina Karika. Grande gjonde pe sô alenadore, Spela Dragaš, che e clarìs: “O soi contente parcè che Tara e je rivade a puartâ in pedane ce che nô o viodìn ogni dì dilunc dai alenaments: cumò e je pardabon competitive ancje in cjamp internazionâl”. (A.I.) – 31.03.2025
Foto di U. Fassbender
