Il comunicât uficiâl al è rivât, un dì dopo vê saludât Andrea Sottil: Gabriele Cioffi al torne ae vuide dal Udin. “L’Udinese Calcio e anunzie la nomine di Gabriele Cioffi tant che gnûf alenadôr de prime scuadre – e dîs la societât -. Al à siglât un contrat che lu learà al club fint ai 30 di Jugn dal 2024, cuntune opzion par une altre stagjon sportive. Cioffi al torne su la bancjute blancje e nere dopo la esperience de stagjon 2021/2022, là che, ae vuide de scuadre, al veve otignût 31 ponts in 22 partidis. Cun lui, a integrin il grup tecnic l’alenadôr in seconde Cristian Bacci e il match analyst (ven a stâi, chel che al studie lis partidis) Andrea Aliboni. De bande di dut il club i augurs di bon lavôr al ‘mister’”. Cu la scuadre al tierçultin puest e cence ancjemò une vitorie in chest campionât, la sielte e je stade duncje chê di riclamâ il tecnic che al è stât prime il vice di Luca Gotti dal Istât 2021 a Dicembar 2022 e po dopo il prin alenadôr fin ae fin dal campionât. (A.I.) – 25.10.2023
95
