Une des scuadris dal campionât talian di balon cun plui forescj e je l’Udin. La plateforme globâl Preply, nassude par imparâ lis lenghis, che e met in contat plui di 20.000 insegnants cun desenis di miârs di students in dut il mont, e à fat une analisi par individuâ lis scuadris plui “internazionâls” de Serie A. L’Udin, ai ultins puescj pal numar di zuiadôrs talians, al è al secont puest in cheste classifiche, cun zuiadôrs di 18 nazionalitâts diviersis, tant che il Napoli. Al prin al è invezit il Turin, cun ben 19. Secont Preply, il “camarin multietnic” al ufrìs oportunitâts di scambi e confront, di là di jessi model di inclusivitât. Il (cuasi) primât dal Udin al è leât ai cambiaments fuarts dal mont dal balon, e ancje dal campionât talian, che intai ultins decenis al à viodût la presince simpri plui fuarte di zuiadôrs che a vegnin dal forest. (A.I.) – 24.11.2022
281
