Lis gjinastis de ASU in corse pal titul

Une scuadre di gjinastis che si vistiran ancje cul tricolôr: e je la Associazione Sportiva Udinese, che no je mai stade cussì “celeste” inte lote pal titul talian. Al novesim an consecutîf in serie A1 (la prime volte e fo intal 2015), la scuadre di ritmiche de ASU, che l’an passât e à vuadagnât il bronç, e larà jù in pedane tal palaç dal sport di Chieti cu la formazion rinovade in maniere parziâl, formade di gjinastis che a àn rapresentât za la Italie in cjamp internazionâl. La formazion che e sfidarà lis miôr scuadris talianis e je stade presentade de tecniche blancje e nere, Spela Dragaš, pôcs dîs prime che al tachi il campionât di serie A1, ai 17 e ai 18 di Fevrâr. Lis finâls a son in program ai 6 e ai 7 di Avrîl a Turin. (A.I.) – 13.02.2024