Lis atletis de ASU prontis pal campionât di A1

Dîs agns di sodisfazions! La gjinastiche ritmiche de ASU – Associazion sportive udinese e celebre intal 2025 il so prin deceni di serie A1. Un travuart che al à viodût il grup blanc e neri cressi, cambiâ, madressi e frontâ gnovis sfidis, otignint simpri risultâts impuartants in graciis de vuide di Špela Dragaš, che e alene la formazion furlane cun Noelia Fernandez, Valeria Pysmenna e il supuart de coreografe Laura Miotti. “Lis fantatis ancje chest an a saran competitivis e a podaran cence altri ambî al podi – e à sclarît la tecniche blancje e nere in ocasion de presentazion de scuadre che e larà in pedane inte stagjon regolâr dal Trofeu “San Carlo Veggy Good”, il campionât di serie A1 di gjinastiche ritmiche, che al tache ai 22 e ai 23 di Fevrâr a Chieti. Po dopo a saran lis tapis a Forlì e Ancone e lis finâls tal mês di Mai a Turin. A vuidâ la scuadre e sarà simpri Tara Dragaš, nassude intal 2007, in A dal 2017 e za protagoniste in cjamp mondiâl e european. No mancjarà la presince di Isabelle Tavano, Gaia Mancini, Victoria Bruno e de todescje Anastasia Simakova. (A.I.) – 12.02.2025