Lazio sustade daspò dal rigôr contestât dai blanc e neris

La disfate in cjase dal Udin cu la Lazio domenie di sere e à lassât daûr di se un mâr di polemichis. Il rigôr assegnât dal arbitri Pairetto par un contat (che nol jere fal) di Masina su Immobile al è stât contestât dal diretôr gjenerâl de societât furlane, Pierpaolo Marino, che al à fevelât di simulazion. La rispueste de Lazio e je stade, in maniere insolite, sustade: “Lis declarazions di Marino no son apropriadis e chês sul presumût condizionament dal arbitri no si puedin acetâ”, si lei intun comunicât uficiâl. Sui sociâl de societât romane, po dopo, al è stât metût ancje un video cu lis peraulis dal dirigjent blanc e neri zontadis su cualchi azion de partide, che al da une idee cetant ‘di part’ dai 90 minûts di domenie passade. (A.I.) – 23.05.2023