La ultime gare di Mara Navarria

La campionesse olimpioniche Mara Navarria e à sierât la sô cariere te scherme cuntun arint a scuadris. La ultime gare e je stade ai campionâts talians di Piacenza, adun cu lis compagnis dal esercit. La ultime gare e à completât une cariere plene di sodisfazions e di grancj risultâts, cun dutis lis vitoriis pussibilis: cuasi cincuante medaiis di bessole e ancjetantis a scuadris, a nivel talian e internazionâl. I miôr risultâts a son stâts il mondiâl individuâl a Wuxi tal 2018 e la medaie di aur ai Zûcs Olimpics di Parîs tal 2024. “O sieri serene – e à sclarît la campionesse furlane, saludade di dutis lis compagnis e de Federazion di scherme – parcè che o ai vinçût dut e al jere propit il moment just par fermâsi. Cumò al è il mont che mi spiete fûr dal sport”. (A.I.) – 11.06.2025