La acuile furlane su la maiute dal Udin

La gnove stagjon de Udinese Calcio si vierç tal segn de identitât furlane. Graciis ae colaborazion cu la ARLeF – Agjenzie regjonâl pe lenghe furlane, il gnûf training kit 2026/27, realizât de Macron, e à sul pet la acuile dal Friûl, simbul storic de comunitât furlane. Une sielte che e infuartìs il leam fra il club e il teritori propit tal an che l’Udin al fâs fieste pai 130 agns de fondazion. Za tai prins alenaments de stagjon, a pene tacâts, i zuiadôrs blancs e neris a àn doprât il gnûf kit, caraterizât dai colôrs blu e zâl dal Friûl. La presince de acuile sul cûr e trasforme la maie di alenament intun simbul di apartignince e e valorize storie e identitât furlane, contribuint a promovile ancje fûr dai confins regjonâi. “O sin une vore contents pe sielte dal Udin di valorizâ sul lis sôs maiis la bandiere dal Friûl – al declare il president de ARLeF, Eros Cisilino – E je une iniziative cuntun significât identitari fuart, che e met adun sport, storie e apartignince e che e contribuìs a mostrâ, ancje fûr de regjon, un simbul une vore inlidrisât intai tifôs e inte comunitât furlane. E je une sielte che e merete i nestris sincîrs compliments”, che nol à puartât nissun finanziament di bande de Agjenzie. La acuile dal Friûl, presinte su la bandiere dal Friûl che e je ancje ricognossude cuntune leç regjonâl, si ispire al vessil doprât dal patriarcje Beltram di Saint Geniès, ae vuide dal Patriarcjât di Aquilee tra il 1334 e il 1350. La bandiere e je la setime plui antighe in Europe e il so esemplâr origjinâl al è conservât tal Museu dal Domo di Udin. La colaborazion jenfri ARLeF e Udinese Calcio e conferme cemût che il sport al rivi a jessi un veicul straordenari di promozion de culture e de identitât dal Friûl, rivant a puartâ un dai siei simbui plui rapresentatîfs sui cjamps di alenament e intai stadis, denant dal public talian e internazionâl. (A.I.) – 07.07.2026