“Il palaç de glace di Pontebe al rapresente un esempli clâr di cemût che i invistiments fats de Regjon pai implants sportîfs a puedin garantî efiets che a durin intal timp e a dan la pussibilitât di ospitâ manifestazions internazionâls impuartantis. La Cope Europe juniores di short track, che si fasarà il prossim fin de setemane, al è un apontament di lustri pe specialitât, di là di une ocasion di promozion virtuose dal nestri teritori e di gjoldi di un spetacul sportîf apassionant e di alt nivel”.
A son lis peraulis dal vicepresident dal Friûl-Vignesie Julie cun deleghe al Sport Mario Anzil che cheste matine, intal Palaç de Regjon a Udin, al è intervignût ae presentazion des garis in program a Pontebe di vinars al 1 a domenie ai 3 di Març. E je la tierce prove dal circuit Star Class che al cjape i Paîs de Europe ocidentâl, dopo chês a Obersdorf (Gjermanie) e Nijmegen (Olande).
Inte manifestazion organizade dal Skating club Pontebba sot de egjide de Federazione italiana sport del ghiaccio (Fisg) e dal International skating union (Isu) si sfidaran su la piste dal palaç de glace lis miôr promessis europeanis dal sgliciâ di velocitât: in dut 190 atletis di 18 Nazions. Tancj di lôr, come dit in conference stampe dal sindic di Pontebe Ivan Buzzi e dal responsabil dal Skating Club Walter Bonatti, a son rivâts za intai dîs passâts jemplant intune cun tecnics e familiârs une ventine di struturis ricetivis dal Cjanâl dal Fier. (a.d.g.) – 26.02.2024
