Il Donatello al va a Palme a cirî talents

La societât di balon dal Donatello di Udin – la ‘farie’ di cetancj zovins talents dal balon furlan e po dopo nazionâl – si sposte a Palme. E je stade firmade une convenzion jenfri la aministrazion comunâl e il Donatello Calcio par doprâ la struture polisportive “Bruseschi” tant che sede pes ativitâts de scuele di balon dedicade al setôr dai zovins. Za tal mês di Mai e jere stade fate la domande uficiâl al Comun di Palme par tacâ un progjet dedicât a 50 fruts e frutis dai 5 ai 8 agns (lis iscrizions a son ancjemò viertis). La firme e je stade fate ae presince dal sindic Giuseppe Tellini, dal assessôr al Sport Thomas Trino, dal conseîr Francesco Martines e di Simone Ronco, che al è il paron dal Donatello Calcio adun cul innomenât campion dal Udin, Antonio Di Natale. (A.I) – 26.08.2025