Il Forum Italic di Rome al à ospitât domenie ai 21 di Mai lis finâls dal Master di tierce e cuarte categorie, cun doi atletis dal F-Vj che a àn combatût pe vitorie: Valentina Nascinbeni e Francesco Piscopello.
Passant pes primis fasis di precualificazions a nivel provinciâl e dopo regjonâl, i doi campions nostrans a son lâts dentri tra i miôr 16 zuiadôrs di Italie, rivant cussì aes fasis finâls di Rome.
“O soi rivade a Rome joibe di sere par contindi il dì dopo l’incuintri dai otâfs di finâl – e conte la Nascinbeni, vincjetrê agns, tesserade al tenis Club Garden di Pasian di Prât -. Passade la prime aversarie, o ai contindût ancje i cuarts inte stesse zornade, intant che la sabide no son stadis partidis. La semifinâl le ai zuiade domenie di matine e, par vie des interuzions par ploie, la finâl le ai terminade passade la miezegnot. Magari cussì no o ai pierdût cuintri une aversarie solide, Maria Chiara Paccara, ma e je stade une esperience tant intense”.
Piscopello, invezit, al è stât protagonist di une rimonte impegnative: al à impleât 2 oris e 24 minûts par imponisi su Emanuele Orlandini par 6-7 7-6 10-4. Inte foto (Fioriti) a çampe Valentina Nascinbeni. (V.V.) – 23.05.2023
