Gnove maiute dal Udin: ve la acuile ‘juste’

La scaudre di balon dal Udin e à presentât a Lignan, intun event inmaneât de Regjon e di PromoTurismo Fvg, la prime maiute (“Home kit”, ven a stâi chê doprade pes partidis “in cjase”), fate de Macron, pe stagjon 2025/26. E je diferente di che dal an passât e di chei prime, cuntune linie origjinâl e inovative e lis bandis blancjis e neris no dretis, ma cuntune piçule curve (compagn dai agns 2005-06 e 200607), cun plui neri che blanc. Daûr dal cuel al è il sproc “i prins blancs e neris de Italie”, la marche de Macron (cu la scrite “fate a Bologne”) e, pe prime volte, la acuile dal Friûl: chê juste, chê di Aquilee, simbul de identitât di cheste tiere. (A.I.) – 16.07.2025