Furl-Run: ve la corse par furlan

No sarà dome une manifestazion sportive, ma di popul, une dimostrazion che la identitât no si cjate dome intun museu, tun teatri o te culture, ma e côr svelte viers l’avignî. Compagn de ASF, la Associazion Sportive Furlane, che dai 4 di Març dal 2023 e lavore par pandi la lenghe e la culture furlane sul teritori doprant il sport, simpri cuntun gnûf progjet. Domenie ai 12 di Avrîl, te suaze des iniziativis de Fieste de Patrie (e dal inovâl pai 50 agns dal taramot), si fasarà la prime edizion de “FURL-RUN la corse par furlan”, la prime che e met in moviment la marilenghe passant pai borcs dal Friûl. Une grande fieste dedicade ai paîs, ae int, ae identitât e ae lenghe di chi. La manifestazion – no competitive, vierte a ducj e cence sore nuie – e tacarà aes 6 di buinore de Basiliche di Aquilee e e larà indevant par 120km, passant i Comuns che a fasin part de ACLiF (Assemblee de Comunitât Linguistiche Furlane), par rivâ a Glemone tor lis 6 di dopomisdì. Dulinvie, une persone e puartarà il testemoni cu la acuile e la bandiere dal Friûl, e dentri di chel al sarà un test pensât di trê inteletuâi furlans, cuntun messaç pe culture, il popul e la lenghe, che al sarà let a Glemone. Si che duncje: cui che al puarte il testemoni, si fâs puartevôs ideâl de identitât furlane. La FURL-RUN e sarà libare: si podarà jentrâ, cori e saltâ fûr là che si vûl, ognidun al podarà cori o cjaminâ pal toc di strade sielt, cence limits. La idee e ven de Korrika, la corse che di passe 40 agns e ven fate tai Paîs Bascs, par sostignî la lenghe e la identitât basche. Un event sociâl e identitari, inmaneât ogni doi agns, che par 11 dîs un daûr di chel altri – dì e gnot, cul soreli o la ploie – e travierse dut il teritori dai Paîs Bascs (Euskal Herria), corint passe 2.000km e tirant dongje plui di 700.000 personis. (A.I.) – 10.04.2026