Doi mês cence il portîr Okoye

Doi mês cence partidis, tacant de prime ‘uficiâl’, chê di Cope Italie fissade pai 18 di Avost: e je la scualifiche che il Tribunâl Federâl Nazionâl de Federazion taliane dal balon, la FIGC, e à decidût pal portîr dal Udin, Maduka Okoye, che al jere stât denunziât cu la acuse di presumût ilecit sportîf e il risi di pierdi fint a cuatri agns di cariere! Il riferiment al jere a une partide cuintri la Lazio dal mês di Març dal an passât, là che il portîr al veve vût dal arbitri un cartelin zâl che, daûr de acuse, al jere stât cjapât a pueste, par une scomesse. Dutis lis acusis a son coladis, si che duncje e je rivade une scualifiche di doi mês pe violazion di un gjeneric ‘principi di lealtât’ daûr de justizie sportive. Okoye nol zuiarà lis primis 6-7 partidis e cun di plui al à vût il plen supuart e la fidance de sô societât, spietant lis motivazions de sentence. (A.I.) – 23.07.2025