Cope dal Mont di schi feminin a Tarvis

La prime volte e fo tal 2007, cuant che la piste Di Prampero e deventà e prime volte un palc internazionâl cui nons plui grancj dal schi: lis austriachis Renate Götschl e Nicole Hosp, la americane Julia Mancuso. Tal 2009 il non plui grant al fo chel de icone Lindsey Vonn, protagoniste ancje tal 2011 cun Anja Paerson e la slovene Tina Maze. Pe cuarte volte te storie, Tarvis e sarà une des tapis de edizion 2025/2026 dal circuit di Cope dal Mont, al puest di Cortine, là che par solit si fasin lis garis di velocitât (ma chest an a son i Zûcs Olimpics), simpri jù pe piste Di Prampero. Daspò dai alenaments di joibe e vinars, sabide ai 17 e domenie ai 18 di Zenâr, lis velocistis plui grandis dal schi mondiâl si sfidaran suntune piste des Alps Juliis che e je deventade vie pai agns une icone, Il comitât organizadôr de “Tarvisio Ski World Cup” e à lavorât par rivâ a un travuart impuartant par ducj: pai turiscj, che a podaran gjoldi di une schirie di events dongje des garis, pal turisim di dute la zone di Tarvis e pes atletis. Massime par chês che a cirin ancjemò i ponts che ur daressin la pussibilitât di lâ a schiâ ai Zûcs Olimpics. (A.I.) – 14.01.2026