Cividât-Madone di mont: inte fin de setemane la gare classiche

L’otâf e ultin cjapitul de Ibiza Cup 2023 di machinis di corse al va in sene inte fin de setemane cu la cuarantesime seste corse Cividât-Madone di mont, inmaneade de scudarie Red White. Si cor pal Trofeu talian di velocitât in mont e a son iscritis sîs Seat Cupra, cun chê dal prin vincidôr de serie privade, o sedi l’agordin Denis Mezzacasa, che si è vuadagnât il sucès cuntune gare in anticip. Aversaris impuartants a son Michele Buiatti, Federico Girardi, Davide Segna, Filippo Spinnato e Andrea Chiuch, che a vuelin otignî un risultât positîf su la aromai classiche cronoscjalade al Santuari di Madone di mont:  6.395 metris cun disnivel di 408 e une pendence medie dal 6,4 par cent. Sabide ai 30 a son in program lis provis, domenie la gare. (A.I.) – 28.09.2023