Cividât cuintri Udin: il derby plui ‘curt’ dal basket

Miercus ai 7, aes 8 e 45 di sere, une novitât assolude al Palaçut di Cividât: il prin derby tra dôs scuadris furlanis di bale tal zei intal campionât di serie A2, ancje se e je stade une sorte di anteprime in Avost pe Cope Italie. L’implant al sarà dut plen, soredut pal entusiasim dai tifôs de Ueb, pe prime volte cussì adalt inte lôr storie e intun bon moment di forme. Ancje la Apu-Old Wild West Udin e à vinçût inte ultime partide, domenie passade ma cence convinci masse. A son previodûts dut câs fintremai ‘trens speciâi’ (la innomenade ‘littorina’ Udin-Cividât) pai tifôs de trasfierte plui curte che e sedi, ancje se no esist une rivalitât tra i doi publics diferents. Ancje se pes cubiis di presidents e alenadôrs Pedone-Boniciolli e Micalich-Pillastrini e je, par ore, la partide plui impuartante dal an. (A.I.) – 06.12.2022