Buri al ripuarte il baseball in serie B cuntune scuadre tant zovine

Il baseball furlan al torne inte seconde serie cu la promozion dai White Sox Buttrio, formazion che e à ereditât une grande tradizion, fate ancje di partecipazions ae serie A e titui regjonâi. Sabide ai 24, la scuadre e à vinçût, dopo la prime partide in trasfierte, ancje la gare di tornade de dispate decisive pe promozion in B, intal implant di vie Cividât, batint il Colorno: une scuadre che no veve mai pierdût vie pe stagjon. La imprese de scuadre vuidade dal alenadôr Lopez Rivero Osbel e je une conferme dal ‘progjet zovins’ inviât in paîs: la etât medie dai zuiadôrs, cuasi ducj di Buri, e je di 17 agns e e cjape dentri ancje fantats di 15 e 16 agns. (A.I.) – 26.09.2022