Bon complean, Paron!

Nassût a Udin ai 25 di Mai dal 1941 (un dì dopo Bob Dylan!), Gianpaolo Pozzo, il “paron” de scuadre di balon de citât, al fâs vuê 85 agns e dute la famee blancje e nere i augure un bon complean. Intai siei cuarante agns ae vuide de societât, al à compagnât il club – daûr des peraulis scritis sul sît web dal Udin di buinore – “a traviers di etis, disfidis, campions e moments che a restarin par simpri te nestre memorie, mantignint simpri la sô vision fisse sul avignî e il so cûr leât a chescj colôrs.” Il diesim puest in cheste stagjon, che nol sucedeve di passe dîs agns e al vûl dì “bande çampe” de classifiche, dongje des primis, nol sarà il regâl che il Paron si spietave – lui al voleve tornâ in Europe! – ma almancul une sodisfazion dopo di cualchi an di fastidis. Pozzo al è ae vuide dal Udin dal Lui dal 1986, cuant che al comprà il club di Lamberto Mazza intun an dificil. Daspò di cualchi an passât a tribulâ, la scuadre no je stade plui in Serie B dal 1995: il prossim al sarà il trentesim tierç campionât in Serie A un daûr di chel altri, cun vot cualificazions pe Cope UEFA, une vitorie de Cope Intertoto, une tierce e cuarte posizion in serie A e trê voltis te Champions League, cun di plui, ducj i campions che al à cjatât fûr ator dal mont. Bon complean, “paron”! (A.I.) – 25.05.2025