ASU, al rive za il prin sucès nazionâl dal an

Daspò dal risultât otim des spadistis de ASU-Associazion sportive udinese, che a son deventadis vice campionessis nazionâls under 12 intes setemanis passadis (Matilde Pizzi, Vittoria Perugini, Sofia Urizio, Zoe Sabbadini), al rive il grant sucès dal floret feminin cu la scuadre under 12 componude di Allegra Parussatti, Elena Peres, Penelope Stoppani e Beatrice Guo Yu, campion di Italie al Grand Prix Kinder Joy of Moving a scuadris, che si è tignût in provincie di Salerno. Intai ultins trê agns al è il tierç aur pal floret blanc e neri: intal 2023 i “Giovanissimi” a son deventâts Campions di Italie a scuadris; l’an passât, medaie di aur individuâl par Tiziano Sartogo; e cumò, a vierzi chest 2025, ve il prin scjalin dal podi ancje pes “Giovanissime”, lis frutis cun mancul di dodis agns. (A.I.) – 04.03.2025