Ancje il sport al fevele furlan

Inte suaze de sfide cruciâl dai play-off che e viodarà la scuadre di bale tal zei UEB Gesteco Cividale cuintri Rieti, il teritori furlan al segne un pont decisîf no dome sul parquet ma ancje sul front de identitât. Domenie ai 10 di Mai, prime de partide de gare 2 in program pes 17:00 li dal PalaGesteco di Cividât, e vignarà presentade in mût uficiâl la colaborazion jenfri la Societât Filologjche Furlane, la ASF (Associazion Sportive Furlane) e la United Eagles Basketball Cividale. L’obietîf al è chel di alorizâ la lenghe dal teritori cun contignûts mirâts dentri dal dinamic contest digjitâl, insiorant la esperience di utents e utentis in gracie de valorizazion linguistiche e de braùre di apartignince. La iniziative e nas de volontât di meti adun il lengaç universâl dal sport cu la lenghe dal teritori. In gracie de consulence linguistiche de Filologjche e dal coordenament de ASF, i canâi sociâi des Eagles a daran acet a contignûts par furlan, sigurant une comunicazion corete e dinamiche. “La UEB Cividale no je dome une scuadre di bale tal zei, e je la espression di un popul – a declarin i rapresentants dai partners coinvolzûts – e puartâ il furlan sui social al vûl dî fevelâ la lenghe dai nestris tifôs e des nestris tifosis, e proietâ la nestre identitât tal futûr digjitâl”. (A.I.) – 08.05.2026