Zovins orchestrâi europeans in ‘residence’ estive a Pordenon

Pal cuint an, e torne in residence inte nestre regjon, al teatri “Verdi” di Pordenon, la orchestre zovine plui celebre dal mont: la Gustav Mahler Jugendorchester. Fondade a Viene plui di 35 agns indaûr di Claudio Abbado, e je il grup zovin plui famôs tal mont, che al selezione e al met dongje i miôr zovins musiciscj europeans. Dai 7 ai 14 di Avost, 110 talents di dute la Europe, ducj jenfri i 18 e i 27 agns, a prontaran il tour estîf e a ufriran cuatri concierts in regjon – a Gurize, Glemone,  Triest e ben si intint a Pordenon – sot de vuide di doi diretôrs: il zovin austriac Tobias Wögerer e une liende vivente, il mestri svedês di plui di novante agns Herbert Blomstedt. (A.I.) – 04.08.2022