Vilis viertis pe musiche tal Friûl di Mieç

Dai 5 di Lui fint a Setembar, il Friûl di Mieç al varà il so festival che al valorize i lûcs publics o privâts plui particolârs dal teritori: “Musica in Villa”, inmaneât dal PIC di 25 agns. Cheste volte il teme comun e je la oposizion “lûs/scûr”, al centri dai repertoris ufierts di artiscj di divignince diferente. Par esempli, il jazzist american Michael Moore, che al fasarà ancje un laboratori, e une schirie di grancj artiscj di chenti in vilis o parcs de zone: Matteo Andri, il duet Casagrande-Bearzatti o chel Missio-De Luisa, la Corâl polifoniche di Rude, l’omaç a José Bragato ideât di Andrea Boscutti e il prin conciert ‘al scûr’ a Vile Manin, fat dal ‘pordenonês a Rome’ Teho Teardo. Si tache cuntune anteprime te vile Mangilli di Flumignan di Talmassons, là che a sunin Sebastiano Zorza (armoniche) e il cuartet di arcs Meti.( A.I.) – 04.07.2025