Une vôs furlane pal festival nazionâl de cjançon di autôr

Al è une vore atîf soredut sui “social” in rêt, là che si cjatin i video cu lis sôs cjançons, dispès une fusion di folk e rock par contâ la vite e l’amôr, ma ancje la vuere e la muart. Andrea Giavitto al è l’unic furlan in gare pe trentesime setime edizion dal festival de cjançon popolâr e di autôr “Musicultura” di Macerata. Un dai 60 in gare sielts di 1328 candidâts (mai cussì tancj) pes “audizions”, Giavitto – un cognon cuntun leam dret cu la cjançon di autôr di chenti – al cjantarà te penultime des dîs seradis che a decidaran i 16 finaliscj, vinars ai 20 di Març tal Teatri di Macerata. (A.I.) – 17.03.2026